काठमाडौं – नेपाली कांग्रेसले समानुपातिकतर्फ प्राप्त सिटअनुसार २० जनाको नामावली निर्वाचन आयोगमा बुझाएपछि पार्टीभित्र नातावाद हावीको चर्चा सुरु भएको छ ।

पार्टीले १५ महिला र ५ पुरुषसहितको सूची आयोगमा पठाएको हो । कार्यसम्पादन समिति बैठकपछि प्रवक्ता देवराज चालिसेले खस–आर्य कोटाबाट दुई पुरुषको नाम पठाइएको जानकारी दिएका थिए । तर सार्वजनिक सूचीमा परेका केही व्यक्तिहरू शीर्ष नेताका आफन्त रहेको विषयमा आलोचना सुरु भएको छ ।

खस–आर्य कोटाबाट समानुपातिक सूचीमा परेका अर्जुननरसिंह केसी, पार्टी सभापति गगन थापाका ससुरा हुन् । त्यसैगरी मधेशी कोटाबाट परेका चन्द्रमोहन यादव पूर्वराष्ट्रपति रामवरण यादवका छोरा हुन् ।

यता मधेशी कोटामै समावेश भएकी निनुकुमारी कर्ण कांग्रेसका प्रभावशाली नेता बिमलेन्द्र निधिकी भान्जी रहेको बताइएको छ।

यी नामहरू सार्वजनिक भएपछि सामाजिक सञ्जाल र राजनीतिक वृत्तमा समानुपातिक प्रणालीमा नेताका आफन्तलाई प्राथमिकता दिइएको आरोप लागेको छ ।