काठमाडौं– खाना पकाउने ग्याँस र सवारी साधनका लागि इन्धनमा कृतिम अभाव सिर्जना गरी कालोबजारी गर्ने गतिविधिमाथि काठमाडौँ महानगरपालिकाले निगरानी बढाएको छ।

ग्याँस उपलब्ध हुँदाहुँदै पनि ‘ग्याँस छैन’ भन्दै उपभोक्तालाई नदिने, बढी मूल्य लिने तथा इन्धन डिपोमा मौज्दात हुँदाहुँदै सवारी साधनलाई तेल नदिने गुनासो बढेपछि महानगरपालिकाले निगरानी संयन्त्र सक्रिय बनाएको हो।

महानगरपालिकाको प्रशासन विभागका प्रमुख महेश काफ्लेले ग्याँस अभावको गलत सूचना फैलाएर मूल्य वृद्धि गर्ने र सर्वसाधारणको जनजीवनमा असहजता सिर्जना गर्नेहरूमाथि कारबाही गरिने बताए। उनका अनुसार नेपाल आयल निगम ले खाना पकाउने ग्याँसको मूल्य प्रति सिलिण्डर १ हजार ९१० रुपैयाँ तोकेको छ र यही मूल्यमा खरिद–बिक्री गर्न व्यवसायी तथा उपभोक्तालाई आग्रह गरिएको छ।

काफ्लेले ग्याँस अभावको आशंकामा उपभोक्ताले आवश्यकता भन्दा बढी ग्याँस सञ्चित गर्न थाले माग र आपूर्तिको सन्तुलन बिग्रने चेतावनी पनि दिए। ‘उपभोक्ता, उद्योग–व्यवसाय र सरकार सबैले जिम्मेवार भएर काम गरे मात्र सहज आपूर्ति सम्भव हुन्छ,’ उनले भने।

यस्तै, पेट्रोल पम्पहरूले मौज्दात इन्धन हुँदाहुँदै उपलब्ध नगराउने सूचना पनि आएको भन्दै महानगरपालिकाले त्यसमाथि पनि निगरानी सुरु गरेको जनाएको छ।

ग्याँस वा इन्धनमा कृतिम अभाव सिर्जना गर्ने गतिविधि देखिएमा महानगरपालिकाको हटलाइन नम्बर ११८० र ९८५१३५६५०९ मा जानकारी दिन आग्रह गरिएको छ। प्राप्त सूचनाका आधारमा आवश्यक अनुगमन र कारबाही गरिने महानगरले जनाएको छ।

उता ग्याँस विक्रेता महासंघ नेपालका अध्यक्ष ज्ञानेश्वर अर्यालले भारतबाट आउने ग्याँसको आपूर्ति अहिलेसम्म नियमित रहेको बताए। उनका अनुसार पछिल्लो समय माग बढेकाले अभावजस्तो देखिएको हो। उपभोक्ताले सञ्चित गर्न थालेमा मात्रै समस्या देखिन सक्ने उनको भनाइ छ।