काठमाडौं- संखुवासभा र धनुषा क्षेत्र नम्बर १ बाहेक सबैतिरको नतिजा आइसकेको छ।

संखुवासभामा अहिले नेकपा एमालेका उम्मेदवार अगाडि छन्। यहाँ एमालेका उम्मेदवार अर्जुनकुमार कार्कीले १३०५१ मत ल्याउँदा राष्ट्रिय स्वतन्त्र पार्टीका उम्मेदवार मिङमा शेर्पाले ११,७८९ मत ल्याएका छन्।

देशभरको नतिजामा राष्ट्रिय स्वतन्त्र पार्टीले १२५ सिट जित्दा नेकपा एमाले ८ सिटमा खुम्चिएको छ। दोस्रो बनेको नेपाली कांग्रेसले १८ स्थान जितेको छ। एमाले अहिले संखुवासभामा अगाडि रहेकाले ९ सिट हुने सम्भावना छ । उता नेपाली कम्युनिस्ट पार्टीले ७ सीट जितेको छ ।

उता धनुषा १ मा राष्ट्रिय स्वतन्त्र पार्टीका किशोरी साह कमलको उम्मेदवारी खारेज हुँदा नेकपाका मातृका प्रसाद यादव अगाडि छन् । तर त्यहाँ घण्टीलाई यादवको भन्दा दोब्बर मत परेको छ।

उम्मेदवारी खारेजीलाई लिएर किशोरीले सर्वोच्चमा रिट हालेका छन् । सर्वोच्चले सोमबार यसमा कारण देखाऊ आदेश दिएको छ । यसबारे आगामी फागुन २९ मा मात्रै छिनोफानो भएर परिणामको टुंगो लाग्नेछ ।

उता पाँचौँ स्थानमा हर्क साम्पाङको श्रम संस्कृति पार्टी छ । उसले भोजपुर, खोटाङ र सुनसरी १ मा जित निकालेको छ। उसले इलाम र पाँचथरमा कडा प्रतिस्पर्धा गरेर सिट गुमाएको छ। उता राष्ट्रिय प्रजातन्त्र पार्टीले जुम्लाबाट एक सिट जितेको छ।

प्रत्यक्षको मतगणना सकिनै लाग्दा समानुपातिकको जारी छ। हालसम्म समानुपातिकमा राष्ट्रिय स्वतन्त्र पार्टीले ४५ लाख ६४ हजार ३१४ मत ल्याइसकेको छ। नेपाली कांग्रेसले १५ लाख ३० हजार ३०९ मत ल्याउँदा नेकपा एमालेले १२,७६,४५१ मत ल्याएको छ।

नेपाल कम्युनिस्ट पार्टीले ६ लाख ८७ हजार १३६ मत ल्याएको देखिन्छ।

हर्क साम्पाङको श्रम संस्कृति पार्टीले ३ लाख २४ हजार ५३३ मत ल्याउँदा राप्रपाले ३ लाख २ हजार २०३ मत ल्याएको छ। उसले राष्ट्रिय दल हुने सम्भावना कायमै राखेको छ।