काठमाडौं – लेबनानमा शनिबार राति इजरायलले गरेको हवाई आक्रमणमा कम्तीमा १५ जनाको मृत्यु भएको छ भने १५ जना घाइते भएका छन् । आक्रमणको मुख्य निशाना राजधानी बेइरुतस्थित एक होटल बनेको थियो, जहाँ युद्धका कारण विस्थापित भएका मानिसहरू बसिरहेका थिए ।

लेबनानको राष्ट्रिय समाचार एजेन्सीका अनुसार उक्त होटलमा भएको आक्रमणमा चार जनाको मृत्यु भएको छ । त्यसैगरी जबल अल बतूम र कफ्र रुम्मान शहरमा गरिएको आक्रमणमा पाँच जनाले ज्यान गुमाएका छन् ।

लेबनान स्वास्थ्य मन्त्रालयका अनुसार देशका अन्य धेरै स्थानमा पनि इजरायली हवाई आक्रमण भएको ।यसबीच हिजबुल्लाहले आक्रमणको जवाफ दिएको दाबी गरेको छ।

इरान समर्थित उक्त समूहले आफ्ना लडाकुहरूले अल‑मलिकिया सैन्य ठिकानामा रहेका इजरायली सैनिकलाई रकेट आक्रमण गरेको जनाएको छ । हिजबुल्लाहले उत्तरी इजरायलको किरयात शमोना शहरमा ‘कामिकाजे ड्रोन’ प्रयोग गरेर आक्रमण गरेको दाबी समेत गरेको छ ।