काठमाडौं– राष्ट्रिय स्वतन्त्र पार्टीका सभापति तथा चितवन निर्वाचन क्षेत्र नं. २ का सांसद रवि लामिछानेले आफूहरूले नागरिक समक्ष गरेका करारलाई पालना गरेर अगाडि बढ्ने बताएका छन् । 

चितवन क्षेत्र नं. २ बाट ५४४०२ मत ल्याएर विजयी भएका लामिछाने निर्वाचन कार्यालयबाट प्रमाणपत्र लिएपछि सञ्चारकर्मीसँग कुराकानी गर्दै इतिहासले नै आफूहरूलाई ठूलो जिम्मेवारी प्रदान गरेकोले आगामी दिनमा सम्हालिएर नआत्तिई अगाडि बढ्ने बताए ।

 सभापति लामिछानेले नागरिकहरूका आम अपेक्षाका बारेमा आफूहरू जानकार रहेको भन्दै सबैलाई समेटेर अगाडि जाने बताए । उनले यो तहको नतिजा आफूहरूको पक्षमा आएकोमा खुसी भएको भन्दै जनताले के सोचिरहेका छन् भनेर संवादमै रहेको बताए ।

 उनले जनताको अपेक्षा अनुसार काम गर्न नसके आफूहरूको अवस्था पनि अहिलेका केही दलहरूको जस्तो हुनेमा सचेत रहेको बताए ।  ‘आगामी बाटो सजिलो छैन, तर असम्भव पनि छैन, मात्तिएर, आत्तिएर हैन सम्हालिएर सुझबुझ तरिकाले जान्छौँ,’ सभापति लामिछानेले भने, ‘फरक मत राख्नेहरूलाई पनि सम्मान गर्छौँ, कसैलाई पनि खेद्ने काम गर्दैनौँ । ‘

उनले विजयी भएर हौसिएर उत्तेजित भएर कसैलाई पनि नराम्रो व्यवहार नगर्न र जहिल्यै अरूको सम्मान गर्न आफ्ना कार्यकर्ताहरूलाई आग्रह गरे ।