काठमाडौं – बाँके–२ मा नेकपा एमालेका उम्मेदवार इस्तियाक राई विजय भएका छन् । फागुन २१ गते सम्पन्न प्रतिनिधि सभा सदस्य निर्वाचनमा राईको जितसँगै एमालेले खाता खोलेको छ ।

गत माघमा मात्र राई जसपा छोडेर एमाले प्रवेश गरेका थिए । ओलीले माघ ५ गते एमालेमा स्वागत गरेका राईले पार्टीलाई पहिलो जित दिलाएका हुन्। देशभर निरासाजनक परिणाम भाेगिरहेकाे एमालेले यहीबाट विजयको खाता खोलेको हो ।

को हुन् राई ?
अशोक राई नेतृत्वको जनता समाजवादी पार्टी (जसपा)का तत्कालीन महासचिव राई माघ ५ गते मात्र एमालेमा प्रवेश गरेका थिए ।

२०३६ साल कात्तिकमा बाँकेमा जन्मिएका मोहम्मद इश्तियाक राई २०५३ सालमा राष्ट्रिय प्रजातन्त्र पार्टी (राप्रपा)बाट राजनीतिमा प्रवेश गरेका व्यक्ति हुन्।

राई २०६२–६३ को जनआन्दोलनताका उपेन्द्र यादव नेतृत्वको मधेशी जनअधिकार फोरम प्रवेश गरेका उनी त्यसको दुई वर्षभित्रै पार्टीको केन्द्रीय सदस्य हुँदै सचिवालय सदस्य र केन्द्रीय सचिव भएका थिए ।

राई २०६४ सालको पहिलो संविधानसभा निर्वाचनमा उपेन्द्र यादवको पार्टी फोरमबाट उम्मेदवार भएर बाँके क्षेत्र नम्बर २ बाट निर्वाचित भएका थिए । त्यसको दुई वर्षपछि २०६८ सालमा श्रम तथा यातायात व्यवस्था मन्त्री बनेका हुन् ।

२०७४ को संसदीय निर्वाचनमा सोही क्षेत्रबाट निर्वाचित भएर केपी ओली नेतृत्वको सरकारका शहरी विकास मन्त्री बनेका थिए । उनी शेरबहादुर देउवाको नेतृत्वमा गठन भएको सरकारमा केही महिना भौतिक पूर्वाधार विकास मन्त्री बने ।

राजनीतिशास्त्रमा स्नातकोत्तरसम्म अध्ययन गरेका मुस्लिम समुदायका राई नेपालगञ्जको शहरी विकास र बाँके जिल्लाको भौतिक पूर्वाधार क्षेत्रमा चर्चित नाम हो ।