काठमाडौं – हिमाली जिल्ला मनाङबाट प्रतिनिधिसभा सदस्यमा नेपाली कांग्रेसका टेकबहादुर गुरुङ विजयी भएका छन्। गुरुङले २ हजार ४१५ मत प्राप्त गर्दै जित हात पारेका हुन् । उनका निकटतम प्रतिस्पर्धी नेकपाकी यशोदा सुवेदीले ४४६ मत ल्याइन् ।

तर निर्वाचन जिते पनि गुरुङले सांसदको शपथ लिन भने पाउने छैनन् । भृकुटीमण्डपस्थित समाज कल्याण परिषद्को जग्गा भाडामा दिने क्रममा भएको अनियमितता प्रकरणमा उनी विशेष अदालतबाट भ्रष्टाचारको मतियार ठहर भएका कारण शपथग्रहणमा कानुनी अड्चन परेको हो ।

विशेष अदालतले २०७९ फागुन १५ गते गुरुङलाई दोषी ठहर गर्दै उनीबाट १ करोड २१ लाख रुपैयाँ असुल गर्नुपर्ने फैसला सुनाएको थियो । हाल उक्त मुद्दा सर्वोच्च अदालतमा विचाराधीन अवस्थामा रहेको छ। मुद्दाको अन्तिम फैसला नआएसम्म गुरुङको सांसद पदको शपथ र पद सम्हाल्ने विषय अन्योलमा रहने देखिएको छ।