काठमाडौं – राष्ट्रिय स्वतन्त्र पार्टीका सभापति रवि लामिछानेले यो निर्वाचनको नतिजा आफ्नो पार्टीको पक्षमा आउने आशयको अभिव्यक्ति दिएका छन् ।

काठमाडौंको चुच्चेपाटीको केन्द्रमा पुगेर मतदान गरेपछि पत्रकारहरूसँगको कुराकानीमा उनले भने, ‘इतिहासको एउटा यस्तो मोडमा देश आइपुगेको छ । मतदानको सुरुवाती चरणमा छौं हामी । मलाई एकदमै सकारात्मक भाव आएको छ । गुड भाइव आएको छ । ऐतिहासिक परिणाम आउँछ जस्तो लागेको छ ।’

जेन-जीको बलिदानका कारण यो निर्वाचन विशेष रहेको उनले बताए । आन्दोलनमा ज्यान गुमाउनेको स्मरणले आफू भावुक भएकोसमेत उनले सुनाए ।

उनले भने, ‘कलिला भाइ–बहिनीहरूको बलिदानपछि परिवर्तनका लागि भएको मतदान हो यो । दुखद घटनाले देखाउन खोजेको सुन्दर भविष्यको चुनाव हो यो । बिगतका कुनै चुनावभन्दा यसको महत्त्व बढी छ । यसकारण म भावुक पनि भए ।’

लामिछाने पहिला बंगलाामुखी मन्दिर पुगेर मतदान केन्द्र पुगेका थिए । मतदान गरेपछि उनले मतपेटिकालाई ढोगेका थिए ।