दुबई – इरान र इजरायल–अमेरिका गठबन्धनबीचको सैन्य मुठभेड खाडीका अन्य देशमा पनि फैलिएको छ । यस क्षेत्रको हवाई यातायात पूर्णतः प्रभावित भएको छ। इरानले खाडी क्षेत्रका विभिन्न स्थानमा ‘प्रतिशोधात्मक’ आक्रमण सुरु गरेपछि यूएई र साउदी अरब जाने दर्जनौँ उडान बीचैबाट मोडिएका छन्।

हवाई उडानहरूको प्रत्यक्ष अनुगमन गर्ने ‘फ्लाइट राडर’ का अनुसार अबुधाबीका लागि उडेका इतिहाद एयरलाइन्सका दुई विमानलाई ओमानको राजधानी मस्कटतर्फ मोडिएको छ। यस्तै, दुबईका लागि उडेको इमिरेट्सको एक विमान मुम्बई फर्किएको छ।

साउदी अरबको राजधानी रियादस्थित किङ खालिद अन्तर्राष्ट्रिय विमानस्थल ओर्लन लागेका कैयौँ विमानलाई होल्ड मा राखिएको छ भने केही विमानहरू उडेकै सहरतर्फ फर्किएका छन्।

अमेरिकी दूतावासमा ड्रोन हमला
रियादस्थित अमेरिकी दूतावासमा ड्रोन आक्रमण भएको छ । यो रिपोर्ट सार्वजनिक भएलगत्तै साउदी अरबको हवाई क्षेत्रमा उच्च सतर्कता अपनाइएको छ। प्रारम्भिक विवरणअनुसार दूतावास परिसरमा केही क्षति पुगेको छ। इरानले खाडी क्षेत्रमा रहेका अमेरिकी सैन्य र कूटनीतिक अखडालाई निशाना बनाउने चेतावनी दिएलगत्तै यो घटना भएको हो।

नेपाली यात्रु अलपत्र
नेपाली श्रमिकको मुख्य गन्तव्य मानिने यूएई र साउदी अरबका उडान प्रभावित भएपछि वैदेशिक रोजगारीमा जाने र फर्कने तयारीमा रहेका सयौँ नेपाली विमानस्थलमा अलपत्र परेका छन्। कतिपय विमान सेवा प्रदायकहरूले आफ्ना उडान तालिका अनिश्चितकालका लागि स्थगित गरेका छन्।

मध्यपूर्वमा बढ्दो यो तनावले विश्वकै व्यस्त हवाई मार्गमध्ये एक मानिने खाडी क्षेत्रको आकाश असुरक्षित बनेको छ, जसको प्रत्यक्ष असर अन्तर्राष्ट्रिय व्यापार र यात्रामा परेको छ।