काठमाडौं – जोर्डनको सेनाले शनिबार आफ्नो भूभागलाई लक्षित गरी आएका दर्जनौँ ड्रोन र मिसाइलहरूलाई सफलतापूर्वक बीचैमा निस्तेज पारेको जनाएको छ । जोर्डनको आधिकारिक समाचार एजेन्सीका अनुसार सैन्य बलले आज देशको हवाई क्षेत्रमा प्रवेश गरेका ४९ वटा शंकास्पद वस्तुहरूलाई ‘इन्टरसेप्ट’ गरेको हो ।

सैन्य स्रोतलाई उद्धृत गर्दै सार्वजनिक गरिएको प्रतिवेदन अनुसार जोर्डनको एअर डिफेन्स प्रणालीले १३ वटा ब्यालिस्टिक मिसाइलहरूलाई आकाशमै ध्वस्त पारेको थियो। त्यसैगरी, जोर्डनको आकाशमा अनधिकृत रूपमा प्रवेश गरेका अन्य ड्रोनहरूलाई पनि सेनाले निगरानीमा राखी खसालेको बताइएको छ।

मिसाइल र ड्रोनहरूलाई आकाशमै नष्ट गर्ने क्रममा त्यसका टुक्राहरू खस्दा केही भौतिक क्षति भएको अधिकारीहरूले बताएका छन्। यद्यपि, यी घटनाहरूमा हालसम्म कुनै मानवीय हताहतीको खबर प्राप्त नभएको सेनाले पुष्टि गरेको छ।

पछिल्लो समय इरान र इजरायलबीच बढ्दो तनावका कारण मध्यपूर्वको सुरक्षा स्थिति निकै संवेदनशील बनेको छ। जोर्डनले आफ्नो सार्वभौमसत्ता र नागरिकको सुरक्षाका लागि कुनै पनि बाह्य आक्रमण वा घुसपैठको कडा प्रतिवाद गर्ने स्पष्ट पारेको छ।