यूएई- दुबईको प्रसिद्ध तथा विश्वकै सबैभन्दा अग्लो भवनलाई विस्फोटको आवाजपछि खाली गराइएको छ।

समाचार अनुसार अनुसार इरानले अमेरिका र इजरायलको हमलाको जवाफमा खाडी देशहरूतर्फ मिसाइल प्रहार गरेपछि विस्फोट भएका हुन्।

इरानले यूएईको अबूधाबी र दुबई, कतारको दोहा तथा साउदी अरेबियाको रियादका केही स्थानलाई निशाना बनाएको छ।

दुबईका बासिन्दाले शक्तिशाली विस्फोट सुनेको बताएका छन् । अहिले पनि आकाशमा मिसाइल उडिरहेको देखेको उनीहरूले बताएका छन्। एक प्रत्यक्षदर्शीका अनुसार विस्फोट यति ठूलो थियो कि झ्यालहरू हल्लिएका थिए।

ट्रम्प बोले– जनताको स्वतन्त्रता मात्र चाहन्छु

अमेरिकी राष्ट्रपतिले वाशिङ्टन पोस्टसँगको कुराकानीमा आफू देशलाई सुरक्षित बनाउन चाहेको बताएका छन्। उनले भने, ‘म आफ्ना जनताका लागि स्वतन्त्रता मात्र चाहन्छु, सुरक्षित देख्न चाहन्छु।’

यसअघि उनले जारी गरेको भिडियोमा इरानी जनतालाई आफ्नै सरकारविरुद्ध उभिन आह्वान गरेका थिए। उनले भनेका थिए, ‘यस्तो मौका बारम्बार आउने छैन।’

दक्षिणी इरानमा ७० जनाको मृत्यु, ९० घाइते

दक्षिणी इरानको होरमोजगान प्रान्तमा भएका हमलामा कम्तीमा ७० जनाको मृत्यु भएको छ । घटनामा ९० भन्दा बढी घाइते भएका छन्।

त्यहाँका स्वास्थ्य अधिकारीहरूले इरानी समाचार एजेन्सीलाई यो जानकारी दिएका हुन्। मिनाब र जास्क सहरमा हमला भएको बताइएको छ।

यसअघि मिनाबमा बालिकाहरूको विद्यालयमा हमला हुँदा ५० भन्दा बढीको ज्यान गएको खबर आएको थियो।