काठमाडौं – श्रम संस्कृति पार्टीका अध्यक्ष हर्कराज साम्पाङ राईले पुराना राजनीतिक दलहरूले देशका लागि अपेक्षित काम गर्न नसकेपछि आफूहरू चुनावी मैदानमा उत्रिन बाध्य भएको बताएका छन्।

शनिबार ललितपुरको जावलाखेलमा आयोजित पार्टीको चुनावी सभालाई सम्बोधन गर्दै उनले पटक पटक जनताले जिताएर पठाउँदा पनि ठूला दलहरूले जनअपेक्षा अनुसार काम नगरेको आरोप लगाए। उनले जनआन्दोलनपछि देश संकटमा पर्दा आफूलाई ठूला भन्ने दलका नेताहरू जिम्मेवारीबाट पन्छिएको दाबी गरे।

साम्पाङले घण्टी चिन्ह लिएर आएको राष्ट्रिय स्वतन्त्र पार्टी अब नयाँ शक्ति नरहेको टिप्पणी गरे। उनका अनुसार उक्त पार्टीका सभापति रवि लामिछाने दुई पटक उपप्रधानमन्त्री तथा गृहमन्त्री भइसकेकाले आफूलाई नयाँ दल भन्न नमिल्ने अवस्था रहेको छ।

उनले लामिछाने गृहमन्त्री रहँदा सहकारी ठगी प्रकरणमा मुछिएको आरोप लगाउँदै त्यसको दोष केवल जीबी राईमाथि थोपर्ने प्रयास गरिएको दाबी गरे।

साम्पाङले देश निर्माणको जिम्मेवारी युवाहरूको काँधमा रहेको उल्लेख गर्दै उनीहरूलाई उत्पादन र विकासको मुख्य शक्ति बनाउने योजना पार्टीसँग रहेको बताए।