काठमाडौं- इजरायल र इरानबीच बढ्दो तनावका कारण मध्यपूर्वको सुरक्षा अवस्था बिग्रिँदै गएपछि तेल अविवमा रहेको नेपाली दूतावासले त्यहाँ रहेका नेपाली नागरिकलाई विशेष सावधानी अपनाउन अपिल गरेको छ ।

शनिबार एक सुरक्षा एडभाइजरी जारी गर्दै दूतावासले पछिल्लो समय विकसित घटनाक्रमलाई नजिकबाट नियालिरहेको स्पष्ट पारेको छ । दूतावासले सबै नेपालीलाई स्थानीय ‘होम फ्रन्ट कमान्ड’ र सुरक्षा निकायका निर्देशनहरू अक्षरशः पालना गर्न, अनावश्यक रूपमा बाहिर ननिस्कन र सधैं सुरक्षित आश्रयस्थल (बङ्कर) को पहुँचमा रहन आग्रह गरेको छ ।

साथै, सूचनामा आधिकारिक समाचारहरूको मात्र विश्वास गर्न र आपत्कालीन अवस्थामा अन्य नेपालीहरूसँग सम्पर्कमा रहन समेत भनिएको छ। अमेरिका र इजरायलको संयुक्त सैन्य कारबाहीपछि मध्यपूर्वभरि युद्धको प्रभाव देखिएकाले बिना अनुमति कतै पनि यात्रा नगर्न दूतावासले सचेत गराएको छ।