काठमाडौं- भारतको गुरुग्राममा नेपाली महिलामाथि सामूहिक बलात्कार भएको छ । भाारतीय समाचार संस्था पीटीआईले जनाए अनुसार एक अटोरिक्सा चालकसहित तीन जनाले ती महिलामाथि सामूहिक बलात्कार गरेका हुन् ।

अधिकारीका अनुसार प्रहरीले बलात्कारको आरोपमा अटो चालकलाई नियन्त्रणमा लिएर सदर प्रहरी चौकीमा एफआईआर दर्ता गरेको छ । कुरुक्षेत्र बस्ने पीडित महिलाको उमेर २६ वर्ष रहेको जनाइएको छ ।

उनी एउटा निजी क्षेत्रमा कार्यरत रहेको भारतीय सञ्चार माध्यमले जनाएका छन् । उनी साथी भेट्न गुरुग्राम पुगेकी थिइन् । निराश भएकी उनले मदिरा पिएको दाबी गरिएको छ ।

त्यसपछि उनी अटोरिक्सा चढिन् । त्यहाँ तीन अरु जना पनि सवार थिए । मदिरा पिएकी महिलालाई घटनाबारे स्पष्ट केही थाहा नभएको दाबी गरिएको छ ।

बेहोस भएकी उनको होस नहरपुर रुपा क्षेत्रको एउटा घरको कोठामा खुलेको थियो । त्यसपछि उनी प्रहरीकहाँ पुगेकी थिइन् ।

प्रहरीमा उनले आफूलाई तीन जनाले सामूहिक बलात्कार गरेको उजुरी दिएकी छिन् । प्रहरीले उत्तर प्रदेश बसोबास गर्ने अटोरिक्सा चालकलाई नियन्त्रणमा लिएको छ ।

स्थानीय अदालतले उनलाई न्यायिक हिरासतमा राख्न आदेश दिएको छ । अरु फरार आरोपीको खोजीकार्य जारी रहेको प्रहरीले जनाएको छ ।