मिर्गौलाले पूर्ण रुपमा काम गर्न नसक्ने अवस्था आउनु भनेको मिर्गौला फेल हुनु हो । मिर्गौला फेल भएका व्यक्तिले स्वस्थ व्यक्तिको मिर्गौला प्रत्यारोपण गर्नुपर्छ । यदि प्रत्यारोपण सम्भव छैन भने । समय समयमा डायलाइसिस गर्नुपर्छ । समय समयमा डायलाइसिस गरेर मात्रै मिर्गौलाका बिरामीको स्वास्थ्य पूर्ण रुपमा ठीक हुँदैन ।
त्यसैले डायलाइसिस गराइरहेका व्यक्तिले खानपान र स्वास्थ्यमा विशेष ध्याल गर्नुपर्छ । खानपानमा ध्यान दिएर सातामा दुईपटक नियमित डायलाइसिस गराउँदा मिर्गौलाका फेल भएका बिरामीको आयु २५ वर्षसम्म रहनसक्ने चिकित्सकहरु बताउँछन् । त्यसैले डायलाइसिस गरीरहेका मिर्गौलाका बिरामीले आफ्नो स्वास्थ्यमा विशेषज्ञ ध्यान दिनुपर्छ ।
डायलाइसिसमा रहेका मिर्गौलाका बिरामीले के खाने के नखाने ?
पानी पिउँदा ख्याल गर्नुस्
मिर्गौलाका बिरामीलाई पिसाब हुँदैन । बिरामीले सेवन गर्ने झोल पदार्थ डायलाइसिस गर्दा नै बाहिर निकाल्नुपर्ने हुन्छ । त्यसैले डायलाइसिस गराइरहेका व्यक्तिहरुले पानी पिउँदा पनि विचार पुर्याउनुपर्छ । धेरै मात्रामा पानी पिउँदा पनि स्वास्थ्यमा असर पर्छ । झोल पदार्थ समेत चिकित्सकको सल्लाहमा सीमित मात्रामा सेवन गर्नुपर्छ ।
तरकारी तथा सागसब्जी उमालेर खाने
डायलाइसिस गराइरहेका मिर्गौलाका बिरामीले पोटासियमयुक्त खाना खानु मुटुका लागि खतरनाक मानिन्छ । पोटासियम बढी भएमा मिर्गौलाका बिरामीको मुटुको धड्कन बन्द भएर मृत्यु हुने खतरा हुन्छ । त्यसैले डायलाइसिस गराइरहेका बिरामीले साजसब्जी उमालेर मरमसला प्रयोग नगरी खानुपर्छ ।
प्रोटिनयुक्त खानामा नियन्त्रण
मिर्गौलाका बिरामीले खाने खानामा हुने विकारयुक्त पदार्थहरु डायलाइसिसकै माध्यमबाट निकाल्ने गरिन्छ । प्रोटिनयुक्त खानाहरु माछा, मासु, च्याउ, डेडागुडी जति धेरै खायो त्यति नै धेरै विकारयुक्त पदार्थ पनि उत्पादन हुन्छ ।
यी पदार्थहरु निस्कासन गर्न डायलाइसिस गराउनुपर्छ । प्रोटिनयुक्त खाद्यान्न बढी खाँदा डायलाइसिस गर्दा पूर्ण रुपमा फोहोर पदार्थ निस्किएन भने शरीर झनै कमजोर हुन्छ । त्यसैले डायलाइसिस गराइरहेका बिरामीले प्रोटिनयुक्त खाना कम खानुपर्छ ।
फलफूलमा नियन्त्रण
डायलाइसिस गराइरहेका बिरामीले फलफूल खाँदा समेत विचार पुर्याउनुपर्छ । स्याउ, मेवा , नास्पाती र भुँइकटहर बाहेक अन्य फलफूल मिर्गौलाका बिरामीका लागि उपयुक्त हुँदैन ।
अम्लिय पदार्थ खानु हुँदैन
मिर्गौला बिग्रिएको बिरामीले डायलाइसिस गराइरहेको छ भने अचार, कागती, अमिलो, अमला, लप्सी, गुन्द्रुक, सिन्की, अमिलो मिसाइएको खाना खानु हुँदैन ।
बासी खानेकुरा खानु हुँदैन
मिर्गौला फेल भएर डायलाइसिस सेवा लिइरहेका बिरामीले बासी खाना खानु भनेको स्वास्थ्यमा समस्या निम्त्याउनु हो । त्यसैले मिर्गौलाका बिरामीले बासी, सडेगलेको खानेकुरा खानु हुँदैन ।
प्रतिक्रिया