काठमाडौं– ०७४ सालको प्रतिनिधिसभा निर्वाचनमा नेकपा (एमाले)का अध्यक्ष केपी शर्मा ओलीले पोखरा हुँदै कुश्मा बागलुङ रेल यातायात सञ्चालन गर्ने विषयमा गरेको भाषण गरेका थिए । जुन विषय नेपाली राजनीतिमा निकै व्यङ्ग्यात्मक र चर्चित बन्यो ।

राज्यले स–साना आयोजना समेत समयमा सम्पन्न गर्न नसकिरहेको अवस्थामा रेल, पानीजहाज, घर–घरमा ग्यास पाइप जडान जस्ता एमाले अध्यक्ष ओलीका भाषणलाई अधिकांश नेपालीले निकै हलुका अभिव्यक्तिका रूपमा लिएका थिए ।

पछिल्लो समयमा तीनै अध्यक्ष ओलीले भाषणमा कुश्मा, बागलुङ रेल लैजाने कुरा गर्न छाडेका छन् भने एमालेको चुनावी घोषणापत्रमा पनि सो विषय समेटिएको छैन । तर, राष्ट्रिय स्वतन्त्र पार्टी (रास्वपा)ले भने ओलीको भाषणलाई पनि उछिनेर कर्णालीको सुर्खेतसम्म रेलको शाखा विस्तार गर्ने विषय आफ्नो घोषणापत्रमा उल्लेख गरेको छ ।

‘मेची–महाकाली विद्युतीय रेलमार्गलाई यात्रु र माल ढुवानीको मेरुदण्ड बनाइने छ भने पोखरा, काठमाडौं, दाङ, सुर्खेत र तराईका प्रमुख सहरहरूमा शाखा मार्गहरू सहित नेपाललाई चीन र भारतका रेल सञ्जालसँग जोडिनेछन्’, रास्वपाको चुनावी वाचापत्रमा उल्लेख छ ।

साथै, रास्वपाले नेपालका प्रमुख सहरमा मध्य कालमा विद्युतीय बस र पछि लामो दुरीको रेलमार्ग सञ्जालमा जोड्न ट्रयाम र हलुका रेल समेटिने घोषणा गरेको छ ।