काठमाडौं– नेपाली कम्युनिष्ट पार्टी (नेकपा) का नेता वर्षमान पुनले आफूले विगतमा जनप्रतिनिधि भएर रोल्पालीको शिर उचो पार्ने काम गरेको र आगामी दिनमा समेत जिल्लाबासीले शिर झुकाउनुपर्ने काम नहुने प्रतिबद्धता जनाएका छन् ।

आगामी २१ फागुनमा हुने प्रतिनिसभा निर्वाचनका लागि सामाजिक सञ्जाल मार्फत भिडियो अपिल जारी गरेर मत माग्दै उनले रोल्पाली जनताको शिर झुक्ने तथा मतको दुरुपयोग गर्ने कुनै काम नगरेको र अब पनि आफूबाट त्यस्ता काम नहुने बताएका हुन् ।

पुनले जनप्रतिनिका रुपमा आफूले जिल्लाको पूर्वाधार विकासमा गरेको कामबारे विस्तारमा चर्चा गरेका छन् । उनले जिल्लाका ७२ वटै वडामा सडक सञ्जाल विस्तार, मदन भण्डारी लोकमार्ग र शहीद मार्ग निर्माणमा आफूले खेलेको भूमिकाबारे सबै जानकार रहेको बताए ।

यस्तै जिल्लाभरका विद्यालयमा आधुनिक भवन निर्माण तथा शैक्षिक गुणस्तर वृद्धि, सबै पालिकामा १० देखि १५ शय्यासम्मका अस्पताल, पालिकाका प्रशासनिक भवन निर्माण तथा सिंचाइ, खानेपानी र विद्युतीकरणमा धेरै काम भएको उल्लेख गरे ।

उनले जनयुद्ध र जनआन्दोलनमा अतुलनीय योगदान गर्ने जिल्लाको जनप्रतिनिधिका रुपमा आगामी दिनमा पनि आफूले जिल्लाको इज्जत बढाउने काम गर्ने प्रतिबद्धता जनाए । ‘रोल्पालाई राष्ट्रिय तथा अन्तर्राष्ट्रिय स्तरमा चिनाउने काम गर्नेछु । राष्ट्र निर्माणमा, राष्ट्रिय स्वाधीनतामा, देशको समृद्धिमा युवाहरुलाई रोजगार/स्वरोजगार बनाउने अभियानमा लाग्नेछु ।’

उनले आफूहरु निरन्तरको त्याग, बलिदान, निरन्तरता र संकल्पसहित भएको शक्ति भएको दाबी गर्दै हावाहुरी, बिना विचार, बिना सिद्धान्त बिना इतिहास, र बिना पृष्ठभूमिका शक्ति या व्यक्तिको पछि कोही पनि लाग्न नहुने बताए ।