काठमाडौं- उत्तरी छिमेकी चीनसहित पाँच देशका नवनियुक्त राजदूतहरूले राष्ट्रपति रामचन्द्र पौडेलसमक्ष ओहोदाको प्रमाणपत्र पेश गरेका छन्।

राष्ट्रपति भवन, शीतल निवासमा मंगलबार आयोजित छुट्टाछुट्टै विशेष समारोहमा राजदूतहरूले प्रमाणपत्र बुझाएका हुन्।

गत फागुन १ गते जिम्मेवारी सम्हाल्न काठमाडौं आइपुगेका चिनियाँ राजदूत चाङ माओमिङले मंगलबार राष्ट्रपति पौडेलसमक्ष ओहोदाको प्रमाण पत्र बुझाए ।

यससँगै उनले नेपालमा आफ्नो जिम्मेवारी औपचारिक रूपमा सुरुवात गरेका छन् । उनी नेपाल आउनेबित्तिकै सक्रिय भएका छन् । उनले चिनियाँ नयाँ वर्षको अवसरमा यसअघि पाटन पुगेर ललितपुर महानगरपालिकाका मेयर चिरिबाबु महर्जनसँगै औ‍पचारिक कार्यक्रममा सहभागिता जनाइसकेका छन् ।

उनी आइसकेपछि मंगलबार मात्रै बसेको मन्त्रिपरिषद्को बैठकले चीन सरकारबाट निर्वाचनका लागि प्राप्त ५८ करोड नेपाली रुपैयाँ अनुदान सहयोग स्वीकार गर्ने निर्णय गरेको छ।

राष्ट्रपति कार्यालयका अनुसार नेपालका लागि कार्यभार सम्हाल्न आएका राजदूतहरूलाई लाजिम्पाटदेखि राष्ट्रपति भवनसम्म रिसल्लासहित बग्गीमा सवारी गराएर लगिएको थियो ।

राष्ट्रपतिसमक्ष मंगलबार अष्ट्रेलियाका राजदूत सिमोन जर्ज इर्न्स्ट, साउदी अरबका राजदूत फहाद मोहम्मद अज्मी म्निक्हरले पनि ओहोदाको प्रमाणपत्र बुझाए का छन् ।

त्यस्तै मालदिभ्सका राजदूत ऐसाहाथ अजिमा र टर्किस गणतन्त्रका राजदूत अली म्युरात एरस्वेले पनि ओहोदाको प्रमाणपत्र पेश गरेका छन्।