काठमाडौं – काठमाडौँ मेडिकल कलेजले राष्ट्रिय महिला फुटबल टोलीकी कप्तान सावित्रा भण्डारी ‘साम्बा’को निःशुल्क उपचार गर्ने घोषणा गरेको छ।

आइतबार प्रेस विज्ञप्ति जारी गर्दै घुँडाको गम्भीर चोटका कारण विगत सात सातादेखि मैदान बाहिर रहेकी भण्डारीको उपचार आफूहरूले निःशुल्क गर्ने प्रतिबद्धता जनाएको हो।

यसअघि कतारमा घुँडाको शल्यक्रिया गराएकी भण्डारीको ग्राफ्ट र मेनिस्कस दुबैमा समस्या देखिएपछि पुनः शल्यक्रिया गर्नुपर्ने अवस्था आएको जनाइएको छ।

उपचारका लागि ठूलो रकम खर्च हुने भएपछि भण्डारीले सामाजिक सञ्जालमार्फत सहयोगको अपिल गरेकी थिइन्। उनले करिब ८० हजार अमेरिकी डलर खर्च लाग्ने उल्लेख गर्दै आर्थिक सहयोगको आग्रह गरेपछि काठमाडौँ मेडिकल कलेजले चासो देखाएको हो।

विज्ञप्तिअनुसार अत्याधुनिक उपकरण र दक्ष जनशक्तिसहित गुणस्तरीय उपचार सेवा उपलब्ध गराउँदै आएको कलेजले आफ्नो सामाजिक उत्तरदायित्व र राष्ट्रिय कर्तव्यलाई ध्यानमा राख्दै भण्डारीको उपचार प्रक्रिया अघि बढाउने जनाएको छ। कलेजले आफूहरू उपचारप्रति जिम्मेवार र संवेदनशील रहेको पनि स्पष्ट पारेको छ। कलेजले साम्बाले मानेको खण्डमा आफू उपचारका लागि तयार रहेको भनेको हो । उता अखिल नेपाल फुटबल संघ एन्फाले भने कतारको एन्फासँग साम्बाको उपचारको पहल गरिरहेको जनाएको छ ।