काठमाडौं– राप्रपाका नेता एवं काठमाडौं क्षेत्र नम्बर ५ का उम्मेदवार कमल थापाले परिवर्तनको एजेन्डा बोकेर आफूहरू जनताको माझ आएको बताएका छन् । 

सोमबार काठमाडौंमा घरदैलोका क्रममा सञ्चारकर्मीसंग कुरा गर्दै थापाले यसपटकको चुनाव यथास्थितिवादी (संघीय धर्मनिरपेक्ष गणतन्त्र पक्षधर) र परिवर्तनकारी (हिन्दू राष्ट्र र राजसंस्था पक्षधर)विचार र शक्तिको बीचमा हुन लागेको भन्दै आफू परिवर्तनको एजेन्डा बोकेर जनताको माझमा आएको बताएका हुन् । 

अहिलेको निर्वाचन जेन-जी आन्दोलनको जगमा हुन लागेकाले युवाहरूको भ्रष्टाचारको अन्त्य र सुशासनमा माध्यमबाट देशको आर्थिक समृद्धिको मागलाई राप्रपाले अघि बढाउने उनले बताए । उनले शिक्षा, स्वास्थ्यको क्षेत्रमा आमूल परिवर्तन गर्ने समेत आफूहरूको एजेन्डा रहेको उल्लेख गरे । 

थापाले जनताहरू समेत परिवर्तनको पक्षमा रहेकाले सुशासनको माध्यमबाट समृद्ध नेपाल निर्माण गर्ने आफूहरूको अभियानमा साथ प्राप्त हुने जिकिर गरे ।