काठमाडौं– नेपाली कांग्रेसले त्रिशूली नदीमा भएको बस दुर्घटनाप्रति गहिरो दुःख व्यक्त गरेको छ।

फागुन ११ गते जारी गरिएको प्रेस विज्ञप्तिअनुसार पोखराबाट काठमाडौं आउँदै गरेको ग १ ख १४२१ नम्बरको यात्रुबाहक बस आज बिहान धादिङको बेनीघाट रोराङ गाउँपालिका–५ भैँसिघाटबाट त्रिशूली नदीमा खसेको हो ।

दुर्घटनाप्रति पार्टी सभापति शेरबहादुर देउवा ले गहिरो दुःख व्यक्त गर्दै मृतकप्रति भावपूर्ण श्रद्धाञ्जली अर्पण गरेका छन्। उनले शोकसन्तप्त परिवारजनप्रति समवेदना प्रकट गर्दै घाइतेहरूको उपचारका लागि सरकारसँग उचित व्यवस्था मिलाउन आग्रह गरेका छन्।

विज्ञप्तिमा पछिल्लो समय सडक दुर्घटना बढ्दै गइरहेको उल्लेख गर्दै यस्ता घटनाको गम्भीर अध्ययन गरी न्यूनीकरणका लागि तत्काल कार्यदल गठन गर्न र आवश्यक कदम चाल्न सरकारको ध्यानाकर्षण गराइएको छ।

विज्ञप्तिमा कार्यवाहक मुख्य सचिव कृष्णप्रसाद दुलालको हस्ताक्षर रहेको छ।