काठमाडौं– कोशी प्रदेशका आन्तरिक मामिला तथा कानुन मन्त्री इन्द्रमणि पराजुलीले संविधानलाई सही ट्रयाकमा ल्याउन पनि निर्वाचन सफल बनाउनुपर्ने बताएका छन्  । 

नेपाल पत्रकार महासंघ कोशी प्रदेशले शुक्रबार विराटनगरमा आयोजना गरेको पत्रकार आचारसंहिता सम्बन्धी प्रशिक्षक–प्रशिक्षण तालिमको उद्घाटन गर्दै मन्त्री पराजुलीले निर्वाचनको विकल्प नरहेको उल्लेख समेत गरे  । उनले स्वतन्त्र, निष्पक्ष, शान्तिपूर्ण तथा भयरहित वातावरणमा निर्वाचन सम्पन्न गराउनु सबैको साझा जिम्मेवारी भएको जिकिर गरे ।

मन्त्री पराजुलीले लोकतान्त्रिक प्रक्रियामा सञ्चारमाध्यमको भूमिका महत्त्वपूर्ण हुने भन्दै पत्रकारहरूले निष्पक्ष र जिम्मेवार ढंगले आचारसंहिता पालना गर्नुपर्नेमा जोड दिए । सामाजिक सञ्जालमार्फत फैलिने दुष्प्रचार र भ्रम चिर्न पत्रकारहरूले सत्य र तथ्यमा आधारित सूचना प्रवाह गर्नुपर्ने उनको भनाइ छ ।  

दुई दिनसम्म सञ्चालन हुने तालिममा कोशी प्रदेशका १४ जिल्लाबाट २८ जना पत्रकारको सहभागिता रहेको छ ।