काठमाडौं– राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह ‘बालेन’ ले रुखमा बाँध्ने, खोरमा थुन्ने जस्ता काम गरेर बाटो निर्माणको काम छिटो बनाउने भनेकोमा कांग्रेसका सभापति गगन थापाले भने ठेक्का प्रणाली सुधार गर्ने नीति ल्याएका छन् ।

कांग्रेसले बिहीबार सार्वजनिक गरेको घोषणापत्रमा ठेक्का प्रक्रियालाई सरल बनाउन खरिद कानुन र बीड डकुमेन्ट मूल्यांकन सुधार गरी प्राविधिक क्षमता, अनुभव र विश्वसनीयतालाई प्राथमिकता दिँदै लागत गुणस्तर र भुक्तानी प्रणाली सुधार गर्ने उल्लेख छ ।

सार्वजनिक खरिद ऐनलाई समयसापेक्ष सुधार गर्ने, कार्यसम्पादनमा आधारित र समयबद्ध भुक्तानी प्रणाली लागू गर्ने कांग्रेसको घोषणापत्रमा उल्लेख छ ।

रास्वपाका वरिष्ठ नेता बालेनले भने ठेक्का प्रणालीको पक्षमा रहेको समस्यालाई नजरअन्दाज गर्दै बाँधेर र थुनेर काम छिटो गराउने अभिव्यक्ति दिएका थिए । जुन अभिव्यक्तिलाई निर्माण व्यवसायी महासंघका अध्यक्षले निन्दनीय भन्दै प्रतिक्रिया दिएका छन् ।