काठमाडौं– नेपाली कांग्रेसले राज्यको ढुकुटीबाट नेताको उपचार गर्न नपाइने नीति लिएको छ। 

बिहीबार चुनाव लक्षित सार्वजनिक गरिएको घोषणापत्रमा पहुँच हुनेले विदेशमा उपचार पाउने र नहुनेले स्वदेशमा ओखती नपाउने विभेदकारी अवस्थाको अन्त्य गर्ने जनाएको हो ।

‘पहुँच हुनेले विदेशमा उपचार पाउने र नहुनेले स्वदेशमै पनि ओखती नपाउने विभेदकारी अवस्थाको पूर्ण अन्त्य गर्छौं’, घोषणापत्रमा भनिएको छ । 

विदेशमा गरिने उपचारका लागि राज्यको ढुकुटीबाट अनुदान दिन नपाइने बाध्यकारी व्यवस्थालाई कडाइका साथ लागू गरिने घोषणापत्रमा उल्लेख छ ।

साथै, कांग्रेसले कानुनको उल्लंघन गरेर राज्यकोषको दोहन गर्ने वा गराउनेलाई नीतिगत भ्रष्टाचारको दायरामा ल्याउने पनि जनाएको छ ।