काठमाडौं– राष्ट्रिय स्वतन्त्र पार्टी (रास्वपा)ले चुनावी घोषणापत्रमा जनताको करबाट तलब भत्ता खाएर राजनीतिक दलप्रति निष्ठा राख्ने कुरा दण्डनीय हुने बताएको छ ।

रास्वपाले आफूले पनि भातृ संगठन नबनाउने भन्दै अन्य दलका भातृसंगठन लक्षित गर्दै निर्ममतापूर्वक घोषणापत्रमा सम्बोधन गरेको हो ।

‘कुनै पनि प्रकारका भ्रातृ संगठन निर्माण नगर्ने स्पष्ट प्रतिबद्धता व्यक्त गर्दछौँ । जनताले तिरेको करबाट तलब भत्ता लिएर राज्यका निकायहरूका विभिन्न ओहदामा बसेर राज्य र संविधानप्रति नभई आफ्नो मातृ राजनीतिक दलप्रति निष्ठा राख्दै काम गर्नु राष्ट्रप्रति अनैतिक र दण्डनीय कृत्य हो भन्ने हाम्रो स्पष्ट मान्यता छ’, रास्वपाले आफ्नो बाचापत्रमा उल्लेख गरेको छ ।  

राज्य संयन्त्र कुनै दलको शाखा कार्यालय नभएको भन्दै रास्वपा सरकारमा आउने बित्तिकै राज्यका विभिन्न निकायहरू–कर्मचारीतन्त्र, शिक्षण सेवा, प्राध्यापन, सुरक्षा निकाय, अदालत तथा संवैधानिक अंगहरूमा राज्यको सेवा उपभोग गर्ने सबैको दलीय आबद्धता अन्त्य गर्न आवश्यक कानुनी तथा संस्थागत व्यवस्था कार्यान्वयन गर्ने जनाएको छ ।