काठमाडौं- नेपाली कांग्रेसका सभापति गगनकुमार थापाले २०४६ सालपछि ०५१ सालसम्मको कांग्रेसले सरकार चलाएको समयलाई कांग्रेसले स्वर्णिम युगका रूपमा लिने बताएका छन् ।

बिहीबार पार्टीको प्रतिज्ञापत्रका सन्दर्भमा आयोजित खुला प्रश्नोत्तर कार्यक्रममा सभापति थापाले त्यसैको जगमा मुलुकको आर्थिक विकास टिकेको बताए ।

तर अब पार्टीले समयानुकुल परिवर्तन हुँदै मुलुकको समृद्धिको यात्रा तय गर्नु पर्ने उनले बताएका छन् ।

‘०४६ सालपछि ०५१ सम्मको कांग्रेसले चलाएको सरकारकै बेला आर्थिक सुधारको दह्रो पाइला टेकिएको थियो’, उनले भने, ‘कांग्रेसले त्यसैको कारण लामो समय कम्युनिष्ट पार्टीका साथीहरूबाट निरन्तर लखेटिनु पर्‍यो । हामी निरन्तर लखेटियौँ । हाम्रा सार्वजनिक नीतिबारे नागरिकलाई बुझाउन सकेनौँ । आज पनि नेपालमा जेजति आएका छन्, त्यसको कथा खोज्दै गए ०५९ साल सुरू गरेकै योजनाको जगमा आएका छन् ।’

पार्टी स्थापनाकालमा नेताहरूले ३० वर्षपछिसम्मको सपना देखेको विषयलाई उनले स्मरण गरे । ‘जननायक बीपी कोइरालाले त्यसबेला प्रत्येक नेपाली म जस्तै मध्यमवर्गीयस्तर हुनु पर्छ भनेर सपना देख्नुभयो’, थापाले भने, ‘आज हामी हिजो गरेका उपलब्धिप्रति गौरव गर्छौँ । हाम्रा ऐतिहासिक मूल्य मान्यतालाई अझै उज्याले बनाउछौँ ।’

०३३ सालको त्यो अप्ठ्यारो दिनमा हातमा ७ वटा ज्यान मुद्दा बोकेर राष्ट्रियता जोगाउन नेताहरू नेपाल आएको उनले बताए । सभापति थापाले भने,‘हाम्रा आफ्ना संघर्षका दिनहरू सम्झन्छौँ । तीस वर्षको पञ्चायती कालरात्रिमा एक पटक पनि हाम्रो नेतृत्वले सत्तातिर हेरेर फर्केन ती दिनहरू सम्झदै हामी अघि बढ्ने छौँ ।’

मुलुकको समृद्धि र समुन्नतिका लागि कांग्रेसले आगामी ३० वर्षपछिको सपना देखेर अघि बढेको उनले दाबी गरेका छन्