काठमाडौं– नेपाल कम्युनिष्ट पार्टी (एमाले)ले आफ्नो चुनावी घोषणापत्रमार्फत महिला सशक्तीकरण, मातृ स्वास्थ्य र उद्यमशीलता प्रवर्द्धनका लागि विभिन्न विशेष कार्यक्रम घोषणा गरेको छ।

घोषणापत्र अनुसार महिला उद्यमशीलता विकास गर्न बैंक तथा वित्तीय संस्थामार्फत २० लाख रुपैयाँसम्म निर्ब्याजी ऋण उपलब्ध गराइनेछ । यस्तो ऋण सहज रूपमा उपलब्ध गराइने र व्यवसाय तथा ऋणको निःशुल्क बीमाको व्यवस्था समेत गरिने उल्लेख गरिएको छ ।

त्यसैगरी, सुत्केरी हुने महिलालाई प्रतिजन्म २० हजार रुपैयाँ मातृ–शिशु पोषण भत्ता प्रदान गरिने एमालेले जनाएको छ । गर्भावस्था अघि र पछि स्वास्थ्य परीक्षणका लागि घरदेखि स्वास्थ्य संस्थासम्मको यातायात खर्च पनि दोब्बर गरिने प्रतिबद्धता गरिएको छ ।

यसका साथै गर्भवती महिलाको स्वास्थ्य सुरक्षा सुनिश्चित गर्न ५ लाख रुपैयाँसम्मको जीवन बीमा निःशुल्क गरिने घोषणा गरिएको छ । एमालेले यी कार्यक्रममार्फत महिला उद्यमशीलता अभिवृद्धि, मातृ तथा शिशु स्वास्थ्य सुधार र महिलाको आर्थिक तथा सामाजिक सशक्तीकरण गर्ने लक्ष्य राखेको जनाएको छ ।