काठमाडौं– नेपाली कांग्रेसले आमनिर्वाचनबाट बहुमतसहितको लोकतान्त्रिक र लोकहितमा समर्पित सरकार बनाउने लक्ष्य लिएको जनाएको छ ।  

बुधबार काँग्रेसले पार्टी कार्यालय सानेपामा पत्रकार सम्मेलन गरी भिजन १० का साथ सार्वजनिक गरिएको प्रतिज्ञापत्रका बारे जानकारी गराउँदै बहुमत सहितको सरकार बनाउने लक्ष्य लिएको जनाएको हो ।

पार्टी प्रवक्ता देवराज चालिसेले पार्टीले यस पटक जिम्मेवारी, दृष्टिकोण र सङ्कल्पको आत्मवोधबाट नेपाल संसारकै एक उत्कृष्ट देश बन्न सक्ने भावना, कार्ययोजना र आधारसहितको प्रतिज्ञापत्र प्रस्तुत गरेको दाबी गरे ।

प्रतिज्ञा पत्रमा उल्लेखित योजना कार्यान्वयनका आधारमा कार्यसम्पादन मूल्यांकन हुनुपर्ने कांग्रेसको चाहना रहेको उनले बताए । उनले सम्मानित भएर बाँच्न पाउने नेपालदेखि समुन्नतिमा लम्कने नेपालसम्मको योजना अघि सारिएको उल्लेख गरे ।

कांग्रेसले आफ्नो प्रतिज्ञा पूरा गर्न तर,अमुक र अर्मूत कारण देखाएर जिम्मेवारीबाट नभाग्ने समेत जनाएको छ ।