काठमाडौं- नेपाली कांग्रेसका सभापति गगन कुमार थापाले आगामी पाँच वर्ष राष्ट्र निर्माणका लाग्ने योजनासहित अघि बढ्ने बताएका छन् ।

बौद्धिक पेशाकर्मी अभियान परिषद्ले बुधबार काठमाडौंमा आयोजना गरेको अन्तरक्रियामा सभापति थापाले यसअघि पटक पटक अवसर पाउँदा सदुपयोग गर्न नसकेको बताएका छन् ।

सभापति थापालले आगामी पाँच वर्ष देशलाई कुनै दुर्घटनामा पर्न नदिई सबैलाई समेटेर राष्ट्र निर्माणका लाग्ने योजनासहित अघि बढ्ने बताए।

उनले पार्टीको प्रतिज्ञा पत्रमा समेत पाँच वर्षपछि परिणाम दिने योजना समेटिएको जानकारी दिए ।

इतिहासका विभिन्न घटनाहरूबाट प्रेरणा लिएर कांग्रेसले युवाहरूले चाहेको जस्तो देश बनाउने जिम्मेवारी लिन चाहेको थापालले बताए ।

उनले देश बनाउन सक्ने सबैभन्दा पुरानो पार्टी कांग्रेस नै भएकाले पार्टीका एजेण्डाहरू तल्लो तहसम्म लानुपर्नेमा जोड दिए।

नेपाललाई अहिले सुधार चाहिएकाले त्यसको ग्यारेन्टी लिएर आफूहरू चुनावमा होमिएको उनको भनाइ छ ।

उनले देश बनाउन सबै राजनीतिक दलहरूलाई मिलाएर लैजानुपर्ने भएकाले यसको नेतृत्व कांग्रेसले गर्ने धारणा राखेका छन् ।

सभापति थापाले लोकतन्त्रलाई हाइज्याक हुने कुराबाट बचाउन, डेलिभरीका लागि र परिणामका लागि बदलिएर आएको कांग्रेस सक्षम रहेको बताए ।