काठमाडौं– नेपाल औषधि उत्पादक संघले दशौ संस्करणको नेपाल फर्मा एक्स्पो फागुनको अन्तिम साता काठमाडौंमा आयोजना गर्ने भएको छ ।  

संघले बुधबार ललितपुरमा पत्रकार सम्मेलन गर्दै फर्मामा नवीनता : भोलिको स्वास्थ्यका लागि भन्ने नाराका साथ आगामी फागुन २८ देखि ३० गतेसम्म काठमाडौंको भृकुटिमण्डपमा १० औं नेपाल फर्मा एक्स्पो आयोजना गर्न लागिएको जनाएको हो ।

नेपाली औषधि उद्योगको विकास र प्रवद्र्धन गर्नका साथै निर्यात गर्न योग्य नेपालका औषधि उद्योगमा प्रयोग भइरहेका प्रविधि, उपकरण, विधि, पद्दतिका बारेमा जानकारी गराउने उद्देश्यले फर्मा एक्स्पो आयोजना गर्न लागेको संघले जनाएको छ ।

औषधी उत्पादनको प्रक्रिया, औषधीको गुणस्तर र मापदण्डका बारेमा एक्स्पोबाट जानकारी प्राप्त गर्न सकिने संघका अध्यक्ष विप्लव अधिकारीले जानकारी दिए । उनले अहिले नेपालमा नै विश्वस्तरको औषधि उत्पादनका साथै अन्य देशमा समेत निर्यात हुने गरेको बताए ।

एक्स्पोमा औषधी उत्पादनमा प्रयोग हुने अत्याधुनिक प्रविधि, कच्चा पदार्थ, प्याकिङ उत्पादक र मेसिनरी लगाएतका करिव २ सय भन्दा बढि स्टलहरु रहने आयोजकले जनाएको छ । त्यस्तै स्वदेशी औषधि उद्योगका उत्कृष्ट उत्पादनहरूको समेत प्रदर्शन गरिने संघले जानकारी दिएको छ ।