विराटनगर– नेपाली कांग्रेसका नेता तथा मोरङ क्षेत्र नम्बर ६ का प्रतिनिधिसभा सदस्यका उम्मेदवार डा. शेखर कोइरालाले बुढीगङ्गा गाउँपालिकामा पछिल्ला वर्षहरूमा उल्लेख्य विकास निर्माणका काम भएको दाबी गरे।

बुढीगङ्गा गाउँपालिकाका ६ वटा वडामा एकै दिन पार्टी कार्यालय उद्‌घाटन गर्दै उनले पिउने पानी, सडक, स्वास्थ्य संस्था लगायतका पूर्वाधार विकासमा उल्लेखनीय प्रगति भएको बताए ।

उनले भने, ‘अरू समयको तुलनामा अहिले बुढीगङ्गाको मुहार फेरिएको छ,’ उनले भने, ‘यदि यहाँ विकास भएको छैन भन्नुहुन्छ भने म त्यसलाई पत्याउँदिन।’

कोइरालाले आगामी निर्वाचनलाई लक्षित गर्दै बुढीगङ्गा गाउँपालिका वडा नम्बर १, २, ३, ४, ६ र ७ का पार्टी कार्यालय उद्‌घाटन गरेका हुन् ।

कार्यक्रममा कांग्रेसकी समानुपातिक उम्मेदवार रुक्मिणी कोइरालाले संविधान र राष्ट्रको संरक्षणका लागि कांग्रेसलाई विजयी गराउन बुढीगंगावासीसँग आग्रह गरिन्।