काठमाडौं – साम्तेन भुटियाले अभिनेता आर्यन सिग्देललाई मुख्य भूमिकामा लिएर फिल्म ‘चच हुई’ निर्देशन गर्ने भएका छन् । यो फिल्म कमेडी शैलीमा निर्माण हुने बताइएको छ ।

‘तान्द्रो’, ‘सुस्केरा’, ‘साढे सात’ जस्ता फिल्म निर्देशन गरेका साम्तेनका फिल्म समीक्षात्मक रुपमा राम्रो प्रतिक्रिया पाए पनि व्यावसायिक रुपमा भने असफल रहे । यद्यपि फिल्म ‘सुस्केरा’ भने अझै रिलिज भएको छैन ।

छायांकन शुरु भइसकेको फिल्म ‘चच हुई’ मा आर्यनले भने केही समयपछि समय दिने बताइएको छ । आर्यन केही दिनअघि मात्र ‘हजार जुनीसम्म’ को छायांकन सकेर दार्जिलिङबाट काठमाडौं फर्केका छन् ।

यो फिल्ममा अमृत घलेले निर्माण गर्ने भएका छन् । यस्तै फिल्ममा राजनराज शिवाकोटी र रोशन थापाको संगीत रहनेछ । फिल्ममा मिरुना मगर र आर्यनलाई एकसाथ देखिनेछ भने भोलाराज सापकोटाको पनि मुख्य अभिनय रहनेछ ।

यो फिल्म मुस्ताङ जिल्ला तथा अन्य स्थानमा समेत छायांकन हुनेछ ।