काठमाडौं- नेपाली कांग्रेसले आगामी प्रतिनिधि सभाको निर्वाचनमा पार्टीसम्बद्ध नेता कार्यकर्ताहरूलाई परिचालन गर्न `फागुन २१ का लागि मेरो २१ दिन´ कार्यक्रम शुरू गर्ने तयारी गरेको छ।

आइतबार बसेको पार्टी केन्द्रीय कार्यसम्पादन समितिको भर्चुअल बैठकले निर्वाचनलाई लक्षित गर्दै यस्तो कार्यक्रम गर्ने निर्णय गरेको हो । त्यसका लागि कांग्रेसले `नेपाली कांग्रेस निर्वाचन परिचालन निर्देशिका ०८२ को बुँदा नं. २१ मा यो विषय उल्लेख गरेको छ ।

‘फागुन २१ का लागि मेरो २१ दिन´ भन्ने प्रतिबद्धतासहित फागुन १ देखि २१ गतेसम्म जसको पदीय जिम्मेवारी जहाँ छ, उसले खट्ने त्यहाँ´ नीतिअन्तर्गत पार्टीका सबै साथीहरू चुनाव मैदानमा खट्नुहुनेछ´, निर्णयमा भनिएको छ।

यसरी खटिँदा केन्द्र, प्रदेश, जिल्ला र क्षेत्रले निश्चित जिम्मेवारीसहित निश्चित ठाउँमा तोकेका प्रतिनिधि यथास्थानमा काम सकेर फेरि आफ्नै जिल्ला/क्षेत्र/पालिका र वडामा केन्द्रित रहन भनिएको छ।

यस्तै तोकिएको जिम्मेवारी लिएर अन्यत्र गएकाबाहेक अरु सबै तहका पार्टी पदाधिकारी र सदस्यहरू आ-आफ्नो क्षेत्र, पालिका र वडामा केन्द्रित रहन भनिएको छ।

कांग्रेसले एउटा वडाको क्रियाशील सदस्य अर्को वडामा जान नपाइने पनि निर्णय गरेको छ । कांग्रेसका सदस्यले अर्को वडामा नगएर `हाम्रो वडा हामी जिताउँछौँ´ उद्घोषसहति आफ्नै वडामा खट्नुपर्ने निर्णय पनि कार्यसम्पादन समितिले गरेको ।

कांग्रेसले पार्टीका सबै भ्रातृ र शुभेच्छुक संस्थामा आवद्धहरूलाई त्यही बमोजिम जिम्मेवारी निभाउन आग्रह गरेको छ।