काठमाडौं– स्वास्थ्यमन्त्री डा. सुधा शर्मा गौतमले क्यान्सर रोगको उपचारमा सरकारले कुनै पनि प्रकारको कमी हुन नदिने स्पष्ट पारेकी छन् । क्यान्सरविरुद्ध सचेतना अभिवृद्धि गर्ने उद्देश्यले अन्नपूर्ण मिडिया नेटवर्कले शनिबार काठमाडौंमा आयोजना गरेको साइकल र्‍याली उद्‌घाटन गर्दै उनले यस्तो बताएकी हुन्।

मन्त्री गौतमले सबै प्रदेशमा क्यान्सर उपचारलाई सहज बनाउने गरी सरकारले आवश्यक व्यवस्था गरिरहेको जानकारी दिइन्। उनका अनुसार स्वास्थ्य क्षेत्रमा धेरै आवश्यकता देखिए पनि प्राथमिकता निर्धारण गर्दै क्रमशः समस्या समाधान गरिनेछ।

उनले यस वर्ष पनि पाठेघरको मुखको क्यान्सरविरुद्ध ‘एचपिभी’ खोप अभियान सञ्चालन गर्न लागिएको जानकारी दिँदै लक्षित समूहलाई उपलब्ध अवसरको अधिकतम लाभ लिन आग्रह गरिन्।

क्यान्सरको उपचारसँगै रोकथाम र सचेतना अत्यन्तै महत्वपूर्ण रहेको उल्लेख गर्दै मन्त्री गौतमले रोग लागेपछि उपचार गर्नुभन्दा रोग लाग्नै नदिन जीवनशैली, नियमित स्वास्थ्य जाँच र खोपजस्ता उपाय अपनाउनुपर्नेमा जोड दिइन्

उक्त साइकल र्‍याली क्यान्सरसम्बन्धी जनचेतना फैलाउने उद्देश्यले आयोजना गरिएको आयोजक संस्थाले जनाएको छ।