काठमाडौं – ब्रिटिश गोर्खा भूतपूर्व सैनिक संगठन (विगेसो) ले सर्वोच्च अदालतको निर्देशनात्मक आदेश कार्यान्वयनको माग गर्दै शनिबार काठमाडौंको माइतिघरमा प्रदर्शन गरेको छ।

संगठनले सर्वोच्च अदालतले जारी गरेको आदेश सरकारद्वारा तीन वर्षसम्म पनि कार्यान्वयन नभएको भन्दै विरोध प्रदर्शन गरेको हो। सर्वोच्च अदालतले नेपाली नागरिकलाई अन्य देशको सेनामा भर्ती गर्न रोक्ने सम्बन्धमा दिएको सकारात्मक फैसलालाई सरकारले बेवास्ता गरेको आरोप संगठनको छ।

विगेसोका अध्यक्ष पदमसुन्दर लिम्बुले २०७९ माघ २४ गते सरकारका नाममा जारी निर्देशनात्मक आदेशलाई संगठनले सकारात्मक रूपमा लिएको उल्लेख गर्दै उक्त आदेश तत्काल कार्यान्वयन गराउन दबाब दिन प्रदर्शन गरिएको बताए।

प्रदर्शनमा सहभागीहरूले ‘संयुक्त राष्ट्रसङ्घका सदस्य राष्ट्रहरू मानवअधिकारप्रति जिम्मेवार बन’, ‘सर्वोच्च अदालतको निर्देशनात्मक आदेश कार्यान्वयन गर’, ‘गोर्खाको पहिचान बेचेर खान पाइँदैन’ लगायतका नारासहितका प्लेकार्ड प्रदर्शन गरेका थिए।

संगठनले सरकारलाई अदालतको आदेशको सम्मान गर्दै तत्काल आवश्यक कदम चाल्न आग्रह गरेको छ।