काठमाडौं- नेपाली कम्युनिस्ट पार्टीका संयोजक पुष्पकमल दाहाल प्रचण्डले फागुन २१ को प्रतिनिधिसभा निर्वाचनमा आफ्नो पार्टी सबैभन्दा ठूलो दल बन्ने दाबी गरेका छन् ।

उनले यस पटक नेकपा एमाले र नेपाली कांग्रेससहितका कुनै दलसँग चुनावी तालमेल नगरिने पनि बताएका छन् ।

बिहीबार पार्टीका केन्द्रीय नेताहरूको जुम बैठकलाई सम्बोधन गर्दै उनले तालमेलको सम्भावनालाई अस्वीकार गरेका हुन् । यसअघि एमाले अध्यक्ष केपी शर्मा ओली र दाहालबीच सम्भावित चुनावी तालमेलबारेमा वार्ता भएको थियो ।

उनले यस पटकको निर्वाचनमा एमालेभन्दा धेरै सीट नेकपाले जित्ने निश्चित भएको पनि जिकिर गरेका छन् ।

उनले एमालेसँग चुनावी तालमेलको सम्भावनाबारे सामाजिक सञ्जालमा आइरहेका कुराहरूमा सत्यता नरहेको पनि बताएका छन् ।

दाहालले एमालेलाई जनताबाट तिरस्कृत र अस्वीकृत तत्वको संज्ञा दिएका छन् । उनले यस पटक कुनै पनि दलसँग कहीँ पनि चुनावी गठबन्धन वा तालमेल नहुने जवाफ नेताहरूलाई दिएका छन् ।