काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछाने आज चितवन जाँदैछन्। माघ ५ गते पछाडि उनी सार्वजनिक कार्यक्रमका लागि लामो यात्रामा निस्किन लागेका हुन् ।

माघ ५ गते जनकपुरमा आयोजित राष्ट्रिय स्वतन्त्र पार्टीको बृहत् सभामा सहभागी हुँदा उनको खुट्टामा चोट लागेको थियो।

इँट्टामा ठोकेर निलो चोट भएको उनको खुट्टा क्रमिक रुपमा सङ्क्रमणको रुपमा फैलन पुगेपछि १३ गते त्रिवि शिक्षण अस्पताल भर्ना भएका थिए।

माघ १५ गते डिस्चार्जपछि उनी घरमै आराम गरिरहेका थिए । उनको सचिवालय सदस्य अविनाश आचार्यका अनुसार अहिले त्रिभुवन विमानस्थलबाट रवि चितवन जान लागेका छन्।

आचार्यले केहीबेरमै चितवनको फ्लाइट रहेको जानकारी गराएका छन्।

आचार्यका अनुसार रविले केही दिनसम्म चितवनमै आराम गरेर शुभचिन्तक र शुभेच्छुकलाई भेट्नेछन् भने खुट्टामा पूर्ण सुधार भएपछि उनी देश दौडानमा निस्कने छन्।