काठमाडौं- ओरालो लागेको सुनचाँदीको कारोबार तिहारमा भने फस्टाएको छ । तीज र दशैँमा समेत उत्साहजनक व्यापार नभएको सुनचाँदीको कारोबार तिहारमा भने अपेक्षाभन्दा दोब्बरले वृद्धि भएको नेपाल सुनचाँदी महासंघले जनाएको छ ।

तिहारको पाँच दिनको अवधिमामात्रै १० अर्ब रुपैयाँको कारोबार भएको छ। यो कारोबार अपेक्षा गरिएको भन्दा दोब्बरले बढी हो । यसपटक ५ अर्ब रुपैयाँको हाराहारीमा मात्र सुनचाँदीको कारोबार हुने अनुमान गरिए पनि दोब्बर बढी कारोबार भएको महासंघले जनाएको छ ।

तिहारमा भएको सुनचाँदीको कारोबारलाई व्यवसायीहरुले उत्साहजनक भनेका छन् । सुस्ताएको कारोबार फेरि फस्टाएको अनुभूति तिहारको व्यापारले गराएको महासंघका निवर्तमान अध्यक्ष तेजरत्न शाक्यले बताए ।

वर्षभरिमा हुने कारोबारको २० देखि २५ प्रतिशत तिहारमा हुने गरेको छ । यसपटक ३५ प्रतिशतभन्दा बढी कारोबार भएको व्यवसायीको ठहर छ ।

सुनको भाउ अकस्मात आकाशिएपछि यसको कारोबार सुस्ताएको थियो । तीजको मुखसम्म आइपुग्दा सुन प्रतितोला ७३ हजारसम्म पुगेको थियो । तर, यो क्रमश घट्दै तिहारसम्ममा ७० हजारसम्ममा आइपुगेको थियो । अहिले सुनको भाउ तोलाको ७१ हजार रुपैयाँ र चाँदी ८ सय ६० रुपैयाँ छ ।