काठमाडौं– विश्व स्वास्थ्य संगठन (डब्ल्यूएचओ) को कार्यकारी बोर्डको १५८औँ बैठकमा नेपालले दक्षिण–पूर्वी एसियाली क्षेत्रका सबै १० सदस्य राष्ट्रहरूको प्रतिनिधित्व गर्दै महत्वपूर्ण नेतृत्वदायी भूमिका निर्वाह गरेको छ ।

बैठकमा विश्व स्वास्थ्य संगठनका महानिर्देशकको वार्षिक प्रतिवेदन २०२५ माथि दक्षिण–पूर्वी एसियाली क्षेत्रका सम्पूर्ण सदस्य राष्ट्रहरूको तर्फबाट कार्यकारी बोर्डका सदस्य तथा स्वास्थ्य तथा जनसङ्ख्या मन्त्रालयका सचिव डा। विकास देवकोटा र वैकल्पिक सदस्य डा। भीमप्रसाद सापकोटाले धारणा राखेका थिए । 

यस प्रतिनिधित्वले अन्तर्राष्ट्रिय स्वास्थ्य कूटनीति र नीति निर्माणको सर्वोच्च तहमा नेपालको प्रभाव र नेतृत्व क्षमताको थप सुदृढीकरण गरेको मन्त्रालयले जनाएको छ । बैठकमा बोल्दै सचिव डा. देवकोटाले क्षेत्रीय तथा विश्वव्यापी सन्दर्भमा स्वास्थ्य आपतकालीन अवस्था रोकथाम, तयारी र प्रतिकार्यलाई उच्च प्राथमिकतामा राख्नुपर्ने आवश्यकता औंल्याए । 

उनले सबै नागरिकलाई स्वास्थ्य सेवामा पहुँच सुनिश्चित गर्ने लक्ष्यका लागि नसर्ने रोगहरूको रोकथाम तथा स्वास्थ्य प्रवर्द्धनका कार्यक्रमहरूलाई प्राथमिक स्वास्थ्य सेवामा पूर्ण रूपमा एकीकृत गर्नुपर्नेमा विशेष जोड दिए । 

नेपालको सक्रिय भूमिकाले दक्षिण–पूर्वी एसियाली क्षेत्रका साझा स्वास्थ्य चुनौतीहरू समाधान गर्न क्षेत्रीय सहकार्यलाई थप मजबुत बनाउने अपेक्षा गरिएको छ ।