काठमाडौं– राष्ट्रिय स्वतन्त्र पार्टीका सभापति रवि लामिछाने चिकित्सकको सल्लाहका कारण मंगलबार चितवन जान सकेनन्। खुट्टामा लागेको चोटमा संक्रमण देखिएपछि उनलाई यात्रा नगर्न चिकित्सकले सुझाव दिएका हुन्।

माघ ५ गते जनकपुर जाने क्रममा खुट्टा ठोक्किँदा निलो डाम बसेको थियो। त्यसैबाट संक्रमण भएपछि उनी अस्पतालमा उपचाररत थिए। अस्पतालबाट डिस्चार्ज भएपछि घरमै आराम गरिरहेका रवि मंगलबार चितवन जाने तयारीमा थिए। तर संक्रमण फैलिने जोखिम बढ्न सक्ने भन्दै चिकित्सकले रोक लगाएको उनको सचिवालयले जनाएको छ।

यसअघि पार्टीका उपसभापति डिपी अरियालले रवि मंगलबार चितवन जाने कार्यक्रम रहेको बताएका थिए। तर स्वास्थ्य अवस्थालाई ध्यानमा राख्दै अन्तिम समयमा कार्यक्रम स्थगित गरिएको हो।

सचिवालयका अनुसार खानपिन वा अन्य शारीरिक समस्याहरू भने छैनन्। खुट्टाको चोटका कारण मात्र उनी बाहिर हिँडडुल गर्न सक्ने अवस्थामा छैनन्। चिकित्सकले पुनः जाँच गरेपछि यात्रा नगर्न आग्रह गरेको सचिवालयको भनाइ छ।

लामिछाने पछिल्लो एक सातादेखि खुट्टाको समस्याका कारण पूर्ण आराममा छन्।