काठमाडौं– पाकिस्तान सुपर लिग (पीएसएल) मा लाहोर कलान्दरबाट खेलिरहेका नेपाली लेगस्पिनर सन्दीप लामिछानेले आफ्नो प्रभाव कायम राखेका छन् । बिहीबार राति कराची किङ्सविरुद्धको खेलमा पनि उनले आफ्नो बलिङ कसिलो पार्दै सर्वाधिक विकेट लिनेमध्ये तेस्रो स्थानमा दर्ज भएका छन् । उनले लाहोरबाट खेलेका ४ खेलमा १० विकेट लिएका छन् ।

लाहोरको पहिलो रोजाईमा पर्दै आएका सन्दीपले कराचीविरुद्ध पनि धारीलो बलिङ गरे । ४ ओभर बलिङ गरेका सन्दीपले १७ रन खर्चेर २ विकेट लिए। उनले कराचीका बाबर आजम र कोलिन मुन्रोको विकेट लिए । ११ रनमा खेलिरहेका बाबर आजमलाई बोल्ड आउट गरेका सन्दीपले मुन्रोलाई ह्यारिस राउफमार्फत क्याच गराएका थिए ।

कराचीविरुद्ध सन्दीपले उत्कृष्ट बलिङ गरेपनि उनको टोली लोहोर कलान्दर ५ विकेटले पराजित भएको छ । पीएसएलमा ४ खेल खेलेका सन्दीपले यसअघिको तेस्रो खेलमा उनको करियरकै उत्कृष्ट बलिङ गरेका थिए । क्वेटा ग्लाडियटर्सविरुद्ध ४ ओभर बलिङ गरेर १० रन दिएर ४ विकेट लिएका थिए ।

लाहोरका लागि सन्दीपको पहिलो खेलमा सन्दीप महंगा सावित भएका थिए । त्यसपछिका दुई खेलमा सन्दीपले लगातार कसिलो बलिङ गर्दै विपक्षी ब्याट्सम्यानमाथि हावी भइरहेका छन् ।

जुन खेलमा उनी ‘म्यान अफ दि म्याच’ समेत घोषित भए । सन्दीपले जारी खेलमा १६ ओभर बलिङ गर्दै ९३ रन खर्चेर १० विकेट लिँदै सर्वाधिक विकेट लिनेको सूचिमा शीर्ष तेस्रो स्थानमा छन् । सर्वाधिक विकेट लिनेमा लिगका ६ खेलमा १६ विकेट लिएका पेसावर जल्मीका खेलाडी हसन अलि अग्रभागमा छन् । लिगका ७ खेलमा ११ विकेट लिएका लाहोरका अर्का खेलाडी हसज राउफ दोस्रो स्थानमा छन् ।