काठमाडौं– राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आफूले दलित समुदायको सम्बन्धमा नबोलेको र कल्पनासमेत नगरेको विषयलाई सामाजिक सञ्जालमार्फत सुनियोजित रूपमा प्रचार गरिएको दाबी गरेका छन्।

सामाजिक सञ्जालमा लेख्दै उनले उक्त कार्यमा संलग्न व्यक्तिहरूलाई तत्काल आफ्नो गल्ती सच्याउन आग्रह गरेका छन्। अन्यथा साइबर कानुनको सहारा लिन बाध्य हुने समेत उनले चेतावनी दिएका छन्। 

अध्यक्ष लिङ्देनले फैलाइएको गलत प्रचारप्रति भ्रममा नपर्न सबैलाई आग्रह गर्दै तथ्यहीन आरोपले समाजमा अनावश्यक तनाव सिर्जना गर्न सक्ने बताएका छन्।

उनले लेखेका छन्, ‘मैले दलित समुदायको सम्बन्धमा बोल्दै नबोलेको र कल्पनासम्म नगरेको विषयलाई सुनियोजित रूपमा प्रचार गरिएको पाइएको छ। यस कार्यमा संलग्नहरुले तत्काल आफ्नो गल्ती सच्याउन आग्रह गर्दछु। अन्यथा साइबर कानुनको सहारा लिन बाध्य हुने समेत जानकारी गराउँछु। भ्रममा नपर्न समेत सबैमा आग्रह गर्दछु।’