काठमाडौं– शेर्पा समुदायको सबैभन्दा ठूलो तथा प्रतिष्ठित फुटबल प्रतियोगिता खुम्बु ल्होसार कप–२०२६ यही माघ २४ गतेदेखि सुरु हुने भएको छ ।  

महेन्द्रज्योती भूतपूर्व विद्यार्थी मञ्च, सोलुखुम्बुले मंगलबार काठमाडौंमा पत्रकार सम्मेलन गर्दै ल्होसार कपको १५औं संस्करण माघ २४ गतेदेखि फागुन ३ गतेसम्म सातदोबाटोस्थित एन्फा कम्प्लेक्सको फुटबल मैदानमा आयोजना हुने जनाएको हो । 

प्रतियोगितामा कुल ८ टिम सहभागी हुनेछन् । जसमा महेन्द्र ज्योति भूतपूर्व विद्यार्थी मञ्च फराक, नाम्चे युथ ग्रुप, खुम्जुङ युथ क्लब, खुन्दे कम्युनिटी क्लब, ठमिछोवा फुटबल क्लब, अमादब्लाम युथ ग्रुप र जुविङ शेर्पा क्यिदुक सहभागी रहने महेन्द्रज्योती भूतपूर्व विद्यार्थी मञ्च, सोलुखुम्बुका महासचिव पेम्बाछिरी शेर्पाले जानकारी दिए । 

उक्त प्रतियोगितामा प्रथम पुरस्कार एक लाख ५० हजार रुपैयाँ नगद राखिएको छ ।

वार्षिक रूपमा आयोजना हुँदै आएको यस प्रतियोगिताले खुम्बु पासाङल्हामु गाउँपालिकाभित्रका समुदायलाई फुटबलमार्फत एकताबद्ध गर्न महत्त्वपूर्ण भूमिका खेल्दै आएको आयोजकले जनाएको छ ।