काठमाडौं- नेपाली कांग्रेसको विशेष महाधिवेशनबाट नवनिर्वाचित सभापति गगनकुमार थापाले पद बहाल गरेलगत्तै पार्टीको तर्फबाट आधिकारिक उम्मेदवारसम्बन्धी पहिलो निर्णय गरेका छन् ।

नवलपरासी (सुस्ता पश्चिम) निर्वाचन क्षेत्र नम्बर १ मा नेपाली कांग्रेसका नेता देवेन्द्रराज कँडेलको उम्मेदवारी आधिकारिक रहेको पहिलो निर्णय गर्दै थापाले निर्वाचन आयोगलाई पत्र लेखेका छन् ।

केन्द्रीय कार्यालय सानेपा पसेर उनले माइन्युटमा पहिलो निर्णय गर्दै आगामी फागुन २१ गते हुने प्रतिनिधिसभा सदस्य निर्वाचनका लागि नवलपरासी जिल्ला निर्वाचन क्षेत्र नम्बर २ मा देवेन्द्रराज कँडेललाई आधिकारिक उम्मेदवारका रूपमा मान्यता दिएका छन् ।

सभापति थापाले निर्वाचन आयोगलाई पठाएको पत्रमा कँडेललाई सोही अनुसार उम्मेदवार कायम गर्न अनुरोध गरिएको छ।

यस कदमलाई कांग्रेसको आन्तरिक विवादपछि उम्मेदवारी प्रष्ट पार्ने र निर्वाचन प्रक्रियालाई औपचारिक रूपमा अघि बढाउने प्रयासका रूपमा हेरिएको छ।

यसअघि बिहीबार नवलपरासी (सुस्ता पश्चिम) निर्वाचन क्षेत्र नम्बर १ मा नेपाली कांग्रेसका नेता देवेन्द्रराज कँडेलको उम्मेदवारी रद्द भएको थियो ।

जिल्ला निर्वाचन अधिकृतको कार्यालयका अनुसार कांग्रेसकै नेता भीमबहादुर थापाले सुरूमा आधिकारिक टिकट लिएर उम्मेदवारी दर्ता गराएपछि कँडेल पुगेका थिए । त्यहीकारण पहिले आएका आधारमा थापा कायम हुँदा कँडेलको उम्मेदवारी रद्द भएको थियो ।

कँडेलले दर्ता नम्बर उल्लेख नगरी क्रम संख्या मात्रै राखेको भेटिएसँगै उम्मेदवारीबारे विवाद भएको थियो । मुख्य निर्वाचन कार्यालयमा पहिले उम्मेदवारी दर्ता गरेका थापालाई मान्यता दिएसँगै कँडेल तनावमा परेका थिए । तर सभापति थापाले कँडेललाई नै मान्यता दिलाउन निर्वाचन आयोगमा पत्र लेख्ने पहिलो निर्णय गरेका हुन् ।