काठमाडौं- अमेरिकी पूर्वराष्ट्रपति डोनाल्ड ट्रम्पको पहलमा गठन गरिएको ‘बोर्ड अफ पिस’मा पाकिस्तान सहभागी भएपछि त्यहाँ राजनीतिक र कूटनीतिक वृत्तमा मतभेद देखिएको छ।

पाकिस्तानका प्रधानमन्त्री शहबाज शरीफ बिहीबार दावोसमा आयोजित ‘बोर्ड अफ पिस’को आधिकारिक समारोहमा सहभागी भए। कार्यक्रममा पाकिस्तानी सेनाका फील्ड मार्शल सैयद आसिम मुनीर पनि उपस्थित थिए।

ट्रम्पले भारत र पाकिस्तानसहित विभिन्न देशलाई गाजासम्बन्धी ‘बोर्ड अफ पिस’मा सहभागी हुन आमन्त्रण गरेका थिए। भारत सरकारले भने यसबारे अझै कुनै निर्णय गरिसकेको छैन। तर पाकिस्तानले ट्रम्पको निम्तो स्वीकार गर्दै सहभागिता जनाएको हो।

पाकिस्तानको विदेश मन्त्रालयले जारी गरेको विज्ञप्तिमा ‘बोर्ड अफ पिस’मार्फत स्थायी युद्धविराम, फलस्तिनीहरूका लागि मानवीय सहायता विस्तार र गाजाको पुनर्निर्माणमा ठोस कदम चालिने अपेक्षा व्यक्त गरिएको छ। साथै, यी प्रयासले फलस्तिनी जनताको आत्मनिर्णयको अधिकार सुनिश्चित गर्न सहयोग पुग्ने पाकिस्तानको विश्वास छ।

यद्यपि, ट्रम्पको पहलमा बनेको संयन्त्रमा सहभागी हुने निर्णयलाई लिएर पाकिस्तानभित्र समर्थन र आलोचना दुवै देखिएको छ।