गोरखा– पूर्वप्रधानमन्त्री डा. बाबुराम भट्टराईले आगामी प्रतिनिधिसभा निर्वाचनमा गोरखा क्षेत्र नं २ बाट उम्मेदवारी दिने घोषणा गरेका छन्। उनले व्यक्तिगत महत्वाकाङ्क्षाभन्दा पनि राष्ट्रिय स्वाधीनता र भू–राजनीतिक सन्तुलनको आवश्यकताले यस निर्णयमा पुगेको बताए।

गोरखा सदरमुकाममा आज आयोजित पत्रकार भेटघाटमा डा. भट्टराईले भने, ‘प्रतिनिधिसभा राज्यको जनप्रतिनिधिको सर्वोच्च थलो भएकाले त्यहाँ रहेर नै राष्ट्रिय स्वाधीनता, सार्वभौमसत्ता र सुरक्षा नीतिसम्बन्धी महत्वपूर्ण निर्णय गर्नुपर्छ। भू–राजनैतिक सन्तुलन मिलाएर देशलाई स्वाधीनताको मजबुत दिशातर्फ लैजान प्रतिनिधिसभामा सक्रिय भूमिका खेल्नुपर्छ।.

उनले संसद् बाहिर भन्दा संसद्भित्र रहेर राष्ट्रहितका एजेन्डा प्रभावकारी रूपमा अघि बढाउन सकिने भएकाले उम्मेदवारी दिने निर्णय गरिएको उल्लेख गरे। लामो छलफलपछि डा भट्टराईले प्रगतिशील लोकतान्त्रिक पार्टी (प्रलोपा) बाट गोरखा–२ मा उम्मेदवारी दिने निर्णय लिएका हुन् ।