वासिङटन– अमेरिकाले सिरियामा गरेको तेस्रो प्रतिकारात्मक हवाई हमलामा अल–कायदा सम्बन्धित नेता बिलाल हसन अल–जासिम मारिएका छन् । 

अधिकारीहरूले उनी गत महिनामा अमेरिकी सैनिक र एक नागरिकको हत्या गर्ने इस्लामिक स्टेट सदस्यसँग प्रत्यक्ष सम्बन्धित रहेको बताएका छन् ।

सेन्ट्रल कमान्डका कमाण्डर एडमिरल ब्र्याड कुपरले भने, ‘अमेरिकी नागरिक र सैनिकमाथि आक्रमण गर्नेहरूका लागि कुनै सुरक्षित स्थान छैन । हामी उनीहरूलाई पत्ता लगाउँछौँ ।’

यो हमला ‘हकआइ स्ट्राइक’ अभियानको भाग हो, जुन राष्ट्रपति डोनाल्ड ट्रम्पले अमेरिकी सैनिकमाथि आक्रमणको प्रतिकारका लागि आदेश दिएका थिए । यस अभियानमा अमेरिकासँगै जोर्डन र सिरियाका साझेदारहरूले १०० भन्दा बढी इस्लामिक स्टेटको आधार र हतियार स्थलहरूलाई लक्षित गरेका छन् ।

सिरियाली राष्ट्रपति अहमद अल–शाराराले यस घटनाप्रति गम्भीर असन्तोष व्यक्त गरे भने अमेरिकी राष्ट्रपति ट्रम्पले यस कदमलाई आतङ्कवादीहरूको पुनर्गठन रोक्ने प्रयासको रूपमा व्याख्या गरेका छन् । रासस