काठमाडौं – शेरबहादुर देउवा समुहका नेता चन्द्र भण्डारीले गगनकुमार थापा र विश्वप्रकाश शर्माको नेतृत्वमा बनेको केन्द्रीय समितिलाई बधाई दिएका छन्। सामाजिक सञ्जालमार्फत शुभकामना सन्देश व्यक्त गर्दै भण्डारीले नयाँ नेतृत्वलाई समावेशी, सद्भावपूर्ण र देशकेन्द्रित बन्न आग्रह गरेका छन्।

भण्डारीले “नयाँ घर शुभ रहोस्, सबै अट्ने, सबैलाई समेट्ने ठाउँ बनोस्” भन्दै पार्टीभित्र एकता र सहकार्यको आवश्यकता औँल्याएका छन्। उनले सद्भाव र प्रेम कहिल्यै नहटोस् भन्ने कामनासहित शब्दको प्रयोग पनि मिठो र जिम्मेवार हुनुपर्नेमा जोड दिएका छन्।

उनले आफ्नो सन्देशमा ‘म’ कमजोर बन्दै जानुपर्छ भन्दै व्यक्तिवादभन्दा सामूहिक भावना बलियो हुनुपर्ने संकेत गरेका छन्। “अन्ततः एक दिन सँगै हिँड्नै छ— इतिहासले यही सिकाउँछ,” भन्दै भण्डारीले पार्टीभित्र देखिएको विभाजन स्थायी नहुने विश्वास व्यक्त गरेका छन्।