काठमाडौं– नेकपा एमालेको युवा विद्यार्थी विशेष जिल्ला कमिटीमा नयाँ इन्चार्जको स्वागत तथा बिदाइ कार्यक्रम सम्पन्न भएको छ । 

बुधबार च्यासलमा आयोजित कार्यक्रममा पार्टीका सचिव तथा राजधानी इन्चार्ज डा. राजन भट्टराई, राजधानी अध्यक्ष नारायण सिलवाल, सचिव मिलन धरेल, बिदा हुन लागेका इन्चार्ज रमेश पौडेल र नयाँ इन्चार्ज समिक कुमार बडाल लगायत सहभागी थिए । 

कार्यक्रममा कमिटीको उपाध्यक्ष श्यामकाजी खत्रीले नेता पौडेलको योगदानको चर्चा गर्दै सबैलाई भावुक बनाएका थिए । 

उनले ले भने, ‘रमेश पौडेलको व्यवस्थापन र व्यक्तिगत त्याग बिना यो कमिटीको संगठित सदस्य संख्यामा वृद्धि र कमिटीको अहिलेको स्थिति सम्भव थिएन। उहाँले घरको किस्ता तिर्न र गहना राखेर पनि कमिटीको लागि आवश्यक रकम व्यवस्थापन गर्नुभएको थियो।’

प्रचार विभाग प्रमुख किरण देउजाका अनुसार युवा विद्यार्थी विशेष कमिटीमा हाल ४५०२ जना सदस्य छन् । जुन केही वर्षमा उल्लेख्य रूपमा बढेको हो। यस कमिटीले अब सक्रिय भूमिका निर्वाह गर्दै पार्टीका गतिविधिहरूमा योगदान दिइरहेको छ। 

कार्यक्रममा बिदा हुन लागेका रमेश पौडेललाई दोसल्ला र कदर पत्रसहित सम्मान गरिएको थियो। ‘तपाईँले देखाएको नेतृत्व र पार्टीको माया हामीले सिक्यौँ। कार्यकर्ता कसरी परिवार भन्दा बढी पार्टीको माया गर्नुपर्छ भन्ने उदाहरण दिनुभयो’, सहभागीहरूले भने । 

कमिटीका नेताहरूले पौडेललाई एमालेका सम्पत्ति र पार्टीको वास्तविक प्रेरणा भएको भन्दै धन्यवाद दिए ।