काठमाडौं- नेपाली कांग्रेसका महामन्त्री गगनकुमार थापाले आगामी निर्वाचनमा कार्यकर्ताहरूले रुख चिह्नबाहेक अन्यत्र भोट हाल्नुनपर्ने अवस्था बनाइने बताएका छन्।

संस्थापन पक्षले बुधबार दिउँसो आफूसहित तीन नेतामाथि कारबाहीको निर्णय गरेपछि विशेष महाधिवेशनस्थलमा सम्बोधन गर्दै उनले यस्तो बताएका हुन् ।

‘कांग्रेसको आत्मा यहीँ छ। तपाईंहरूले अब रुखबाहेक अन्यत्र भोट हाल्नु पर्दैन’, उनले भने, ‘विशेष महाधिवेशनले भंग गरिसकेको केन्द्रीय कार्यसमितिमा नाममा भएको कारबाहीलाई हामी यहीँबाट खारेजको घोषणा गर्छौँ ।’

विशेष महाधिवेशनस्थलमा बुधबार प्रतिनिधिहरूलाई सम्बोधनका क्रममा चौधौँ महाधिवेशनबाट निर्वाचित कमिटी भंग गरेर निर्वाचन आयोगलाई जानकारी गराइसकेको पनि उनले बताए ।